Aya na pueblu di Ternate, Probinsiya de Cavite. Tieni Monti ay numbri Casa Nina. Ay Casa Nina taya na parabahu na kantu di Luneta St. pati Sto. Nino St. Aya na kantu di Luneta pati Sto Nino. Tiene baluntaryo. Esti baluntaryo ay agwa no ta para, tuloy tuloy ay gutyada. Tiene bes aya mihutru ta pasa para enda na Monti di Casa Nina. Ay una pa kaminu para enda na Casa Nina aya na tierra di Senor Isabelo Huerto, Senor Felipe, Senor Enchoy, Senora Panyang at saka na looban di Tiong Toy Salcedo. Todu tiempu mihutru ta enda aya, palagi mihutru ta miedu kasi nga ta habla ay mga bieha I biehu tiene manglalabas, inkantu, malignu, duwendi pati kapri aya.
     Cuandu mga muchachu pa mihutro, palagi mutru ta enda aya na Casa Nina, para huga, saka ramas de ponu para se krismas tree.

     Cuandu mga muchachu pa mutro, palagi mutro ta enda aya para se cose cose, huga alikandoy, taguang pati bahay-bahayan. Tuwing di enda motru aya na Monti ta ma pansin yo muchu pahru pati mga animal. Ta tira mutru kel mga pahru pati animal kung tirador, pero muchu mga biehu pati bieha ta habla lutru kung mutru no tira kung mga kelya kasi baka daw mga enkantaw. Siyanga pala ta habla rin lutru kung mutro kuedaw daw pag takamina mutro aya na Monti di Casa Nina dahil baka raw pesa mutro kung kel mga Nunu. Kaya pag ta enda motru aya medyu tamiedu mutru baka nga tameng pisa mutro kung kel mga Nuno.
     Kaya lang medyu delikaw aya kasi muchu espinas di ponu'y aroma, kraskas di istiyonis pati kebraw boti. Aya na Monti di Casa Nina, muchu sembra ligaw, tieni aya sampaluk, lomboy, guyabas pati susung kalabaw. Ay susong kalabaw ya keda nuway, maski quien no sabi kosa ya enkrese basta ya lang ya keda nuway.
     Tiene tiempu ta enda mutru na gilid di Monti, para saka estiyonis, lukan pati peskaw. Ta se din mutru bintol, kasi ba tamieng, bung grandi grandi ay mga kangrehu aya. Pag di nonchi ta se mangilaw motru, bung grandi grandi ay mga kamarong, peskaw, kangrehu, at saka prestu para kohe aya. Kaya lang medyu trabahu se mangilaw aya, bung rebalusu ay lodu at bung hundu. Pag ya pisa motru na lodu di sumi hondu kel di mutro stinelas, bung trabahu para kita ay stinelas, cheni bes ta robenta pa ay goma o kaya tameng ta matanggal na gurehu.
     Ta senyala yo pag grandi ay agua, no muna motro ta enda na orilya di Monti di Casa Nina, kasi no tieni tierra para kamina o pisa.. Tieni bes tameng pati na drentu di Casa Nina, gradi din ay agua, kaya pag chiquitu ya ay agua o nuway ma agua na drentu, pag ta enda mutru aya, bung lodu tameng.
     Ay Monti di Casa Nina, bung muchu kasaysayan para kung mutro mga kabataan kuandu 1950's.
     Pero esti kuandu Eneru 5, ya mira yo ay Monti Di Casa Nina, nuway ma aya.
     Cheni ya aya mga Casa, maski un puno para senyala ay nakaraan nuway ma. Ay boluntaryo nuway ma rin. Pati ay numbri di kalyi.
     Otro ya rin.
     Andy R. Huerto